Oil spill sa Teresa at Morong river

MORONG, Rizal – Multi-milyong halaga ng mga pananim ang pinangangambahang hindi na mapakikinabangan matapos na masalanta ang mga bukirin sa apat na barangay ng bayang ito ng may tumagas na langis mula sa isang pabrika ng semento sa karatig-bayan ng Teresa, Rizal.

Ayon kay Morong Mayor George Bernardo, nabatid na positibong nagmula ang tone-toneladang langis na tumagas sa Fortune Republic Cement sa Brgy. Dulong, Teresa, Rizal.

Dumiretso ang langis sa katabing-ilog at bukirin sa Barangay Bubungan, San Jose, San Juan at San Guillermo.

Bukod sa mga masasalantang pananim, nanganganib rin na malason ang mga isda sa Teresa-Morong river na dinaluyan ng naturang langis.

Sinabi ni Mayor Bernardo na pinaghahandaan na ng pamahalaang lokal ang pagsasampa ng kaukulang asunto laban sa Fortune Republic Cement.

Napag-alamang nagsasagawa na ng paglilinis ang mga kagawad ng Philippine Coast Guard sa naturang ilog upang mapigilan ang pagkalat ng tumagas na langis. (Ulat ni Danilo Garcia)