Barangay Captain inambush

CAMALIGAN, Camarines Sur – Isang barangay captain ang iniulat na binistay ng bala ng baril ng mga hindi kilalang armadong kalalakihan na pinaniniwalaang mga miyembro ng rebeldeng New People’s Army (NPA) habang ang biktima ay nagmamaneho ng kanyang van kamakalawa ng gabi sa Quibarao drive, Bagong Bayan Sur ng bayang ito.

Kinilala ng pulisya ang biktima na si Rudy Prado, 55, may asawa ng Brgy. San Juan ng nabanggit na lugar.

Samantala, ang mga suspek na sakay ng isang kulay puting Nissan Vanette van na may no. 5209 ay mabilis na nagsitakas sa direksyon ng main road ng Bagong Bayan.

Napag-alaman na kasalukuyang nagmamaneho ang biktima ng kanyang van na may plakang DLF-139 patungong paradahan ng mga jeep nang pagbabarilin ng mga suspek.

Narekober ng pulisya sa pinangyarihan ng krimen ang may 32 basyo ng bala ng M-14 at kasalukuyang inaalam ang motibo sa pagpatay sa biktima. (Ulat ni Ed Casulla)