Bgy. Tanod dinukot bago pinatay

DASMARIÑAS, Cavite – Isang barangay tanod ng Malate, Maynila ang dinukot bago pinagbabaril hanggang sa mapatay ng mga hindi kilalang kalalakihan ang natagpuan na itinapon sa Brgy. Salawag ng bayang ito kahapon ng umaga.

Ang biktima na nagtamo ng maraming tama ng bala ng baril sa ibat ibang bahagi ng kanyang katawan ay nakilalang si Romeo Robedo, 38, may asawa ng 1925 Mother Ignacio St., Malate, Maynila.

Sa inisyal na ulat ng pulisya, natagpuan ang bangkay ng biktima dakong alas-5:00 ng madaling araw na nakatali ang dalawang kamay na pinaniniwalaang biktima ng summary execution.

May mga palatandaan na pinahirapan muna ang biktima bago dinedo ng mga hindi pa nakikilalang kalalakihan.

May teorya ang pulisya na may malaking atraso ang biktima sa mga suspek kaya tinuluyan ito. (Ulat ni Cristina Go-Timbang)