Trader todas sa kapwa trader

SILANG, Cavite – Pinagbabaril hanggang sa mapatay ang isang trader na lalaki ng kanyang karibal sa negosyong scrap dealing makaraang sulutin ng biktima ang nakuhang kontrata ng huli kahapon sa Barangay Tibig ng bayang ito.

Kinilala ng pulisya ang nasawing biktima na si Rolando Bayona, 36, may-asawa, isang scrap dealer at residente ng nabanggit na brgy.

Samantala, ang suspek na ngayon ay tinutugis ng follow-up team ng pulisya ay nakilalang si Reynaldo De Jesus, 49, may-asawa, isa ring scrap dealer ng naturang lugar.

Ayon sa pulisya, ang dalawang negosyante ay matagal ng magkaribal sa negosyo at dahil sa malimit na sulutin ng biktima ang nakukuhang scrap deal ng suspek ay pinagbabantaan na itong patayin.

Nabatid sa impormasyong nakalap ng pulisya sa ilang malapit na kaibigan ng dalawa na hindi na matagalan ng suspek ang ginagawang panunulot ng biktima sa kanyang negosyo kaya dakong ala-una ng hapon nang isagawa ang krimen. (Ulat ni Cristina Go-Timbang)