Anak ng British national dinukot ng ASG

Dinukot ng apat na armadong kalalakihan na pinaghihinalaang mga bandidong Abu Sayyaf Group (ASG) ang isang anim na taong gulang na batang babae na anak ng isang mayamang British national sa mismong tahanan nito sa Lamitan, Basilan, kamakalawa ng gabi.

Batay sa ulat na tinanggap ng Camp Aguinaldo, ang panibagong biktima ng kidnap ay nakilalang si April Adzam Razul Grant.

Ang biktima ay anak ng British national na si Frank Grant na kamakailan lamang ay nagpa-convert na Muslim ay estudyante ng Lamitan Elementary School.

Ayon sa inisyal na imbestigasyon, ang insidente ay naganap pasado alas- 9 ng gabi sa Sitio Baroy, Barangay Senga, Lamitan, Basilan. Bigla na lamang pinasok ng apat na suspect ang bahay ng pamilya Grant at nang makita ang bata ay sapilitan nila itong tinangay.

Ayon sa pinakahuling ulat ng mga awtoridad, humihingi ng P100,000 ransom ang mga abductors kapalit ng kalayaan ng biktima. (Ulat ni Joy Cantos)