Mga bayan sa Cavite lubog sa baha

CAVITE – Umapaw na ang halos lahat ng mga ilog sa lalawigang ito dahilan para lumubog ang mga bayan dito dulot na rin ng bagyong Seniang.

Sa kasalukuyan ay lagpas tao na ang tubig-baha sa bayan ng Noveleta, Kawit, Rosario, Cavite City at Bacoor habang sa bayan ng Dasmariñas at Imus ay hanggang beywang na ang tubig. Ang toll bridge ay hindi na rin madaanan ng mga sasakyan, gayundin ang Salitran bridge sa bayan ng Dasmariñas ay bumigay sa sobrang lakas ng agos ng tubig.

Nag-ikot na sina Cavite Gov. Ramon Bong Revilla Jr. at Dasmariñas Mayor Pidi Barzaga upang tumulong sa mga nabiktima ng bagyo, katuwang ang Rescue 161 at DSWD, gayundin ang rescue team at namigay ng mga gamot, damit at mga relief goods sa mga apektadong residente.

Ayon kina Revilla at Barzaga, hindi nila sukat akalain na sa loob ng nakalipas na mahigit 20 taon at ilang bagyo at kalamidad na rin ang dumaan sa lalawigan ng Cavite ay ngayon lamang nangyari ang ganito ka-grabeng pagbaha. Dati umano kahit pa sabay-sabay ang pagdating ng ilang bagyo ay hindi lumulubog ang lalawigan ng Cavite.

Ngayon din lamang umano nangyari na mga bahay, sasakyan at malalaking puno ang tinatangay ng tubig-baha na dati ay mga basura lamang. Marami na rin ang nasirang mga tulay kung kaya stranded ang mga pasahero at residente dito.

Lubhang naapektuhan ng nasabing bagyo ang bayan ng Bacoor, Dasmariñas, Cavite City, Kawit, Naic, Silang, Rosario, Noveleta at Imus na habang isinusulat ang balitang ito ay hindi pa rin bumaba ang lagpas-taong tubig baha. (Ulat ni Cristina Go-Timbang)