Beybi kinarga sa leeg ng kapatid, patay
Inakalang natutulog lang
MANILA, Philippines — Isang malalimang imbestigasyon ang isinasagawa ng pulisya na kung may kinalaman ang pagkamatay ng isang sanggol sa ginawang pagkarga sa leeg ng kanyang 3-anyos na ate habang iniaakyat sa ikatlong palapag ng kanilang bahay sa Tondo, Maynila.
Natuklasan na isa nang malamig na bangkay nitong Martes ang inaakalang natutulog na sanggol sa tabi ng kanyang 3-anyos na ate na naglalaro.
Kinilala ang nasawing 20-araw na sanggol na si Einjel Ewwie Manzon,residente ng 1301 Flores Bugallon St., Tondo, Maynila.
Sa ulat ng Manila Police District (MPD)-Homicide Section, nabatid, alas-11:30 ng umaga nang madiskubreng wala ng buhay ang biktima sa tabi ng kanyang naglalarong kapatid.
Ayon kay Victoria, kaanak ng biktima, kadarating lang niya ng bahay at nakita niya na natutulog ang mga magulang ng bata sa ikalawang palapag ng bahay.
Pag-akyat ni Victoria sa ikatlong palapag ay nakita niya ang sanggol na nakadapa, habang katabi ang kanyang ate na abala sa paglalaro.
Nilapitan ni Victoria ang sanggol ngunit laking pagkagulat nang mapunang hindi na ito kumikilos kaya’t agad pinuntahan ang mga magulang na nasa kabilang kuwarto at isinugod ang sanggol sa Ospital ng Tondo ngunit idineklarang dead on arrival.
Nabatid na may limang araw na ang nakakalipas nang makita nila ang 3-anyos na kapatid na kinarga umano ang sanggol sa leeg para iakyat sa ikatlong palapag ng bahay.
- Latest
