Walang dalang cellphone at pera kaya... Dalaga ginahasa ng 2 holdaper

MANILA, Philippines – Dahil sa umano’y walang mahalagang gamit na mapapakinaba­ngan ng dalawang lalaki sa isang 18-anyos na dalaga na kanilang hinoholdap ay halinhinan na lang nitong gahasain na naganap kamakalawa sa Caloocan City.

Sinamahan ang biktima na itinago sa pa­ngalang Anna ng kanyang pamilya para magsampa ng reklamo laban sa dalawang lalaki.

Nang maisalarawan ng biktima ang dalawang suspek ay agad nagsagawa ng follow-up operation ang pulisya at nadakip si Steven Catorse, 18-anyos, ng St. Claire Street, Maligaya Park Subdivision. Habang pinaghahanap ang kasamahan nitong nakilala sa alyas na “Batik”.

Sa salaysay ng biktima dakong alas-12:00 ng hatinggabi ay pauwi ang biktima sa kanyang bahay sa Magalang Extension, Maligaya Park Subdivision nang hara­ngin ng dalawang suspek at holdapin.

Nang malaman na walang mahalagang gamit na matatangay sa biktima ay  kinaladkad ito sa madilim na bahagi ng kalsada at doon ay halinhinang ginahasa habang nakatutok ang patalim.

Pinakawalan ang biktima matapos na makaraos ang mga suspek.

Ang mga suspek ay kinasuhan ng robbery hold-up at rape.