Nanalong Kapitana, mister inatado nang saksak

MANILA, Philippines - Nasa kritikal na kalagayan ang nanalong  barangay chairwoman at mister nito matapos na sila ay dambahin at pagsasaksakin ng isang lalaki habang pauwi sa kanilang bahay kahapon ng madaling-araw sa Brgy. Banalo, Bacoor City, Cavite.

Ang mga biktima ay kinilalang sina Grace Lucas Timba 48, at ang mister nito na si Ernesto.

Tumakas ang suspek na nakilala sa  alyas Dan Dan residente ng Brgy. Sinuguelasan ng nasabi ding lunsod.

Nabatid na dakong alas-2:30 ng madaling-araw habang naglalakad ang mag-asawa pauwi sa kanilang bahay nang bumulaga at hinarang sila ng  suspek at walang sabi-sabing inundayan ng saksak.

Ilang nakasaksi sa pangyayari ang nagsugod sa mag-asawa sa pagamutan.