Eala kumpirmado sa ASB Classic
MANILA, Philippines — Maagang sisimulan ni Alex Eala ang season nito dahil agad itong sasalang sa ASB Classic sa Auckland, New Zealand na aarangkada sa Enero.
Inaasahang hindi masyadong makakapag-party si Eala sa holiday season dahil sasailalim ito sa pukpukang ensayo para sa WTA 250 event na papalo sa Enero 4 hanggang 10.
Inaasahang isa si Eala sa mga seeded players sa naturang torneo dahil sa kaniyang mataas na ranking sa WTA.
Kasalukuyan itong nasa No. 15 sa WTA — ang pinakamataas na ranking ni Eala sa kaniyang tennis career.
Hindi ito ang unang pagkakataon na maglalaro si Eala sa Auckland.
Nasilayan na ito noong Enero ng taong ito kaya’t excited si Eala na muling bumalik sa New Zealand sa susunod na taon.
“I loved my time in Auckland. Of course, the support there was amazing, especially from the Filipino community. The people there were super-nice. The city was super-nice. I was there during New Year so it was a great experience for me,” ani Eala.
Matatandaang umabot si Eala sa semifinals ng singles kung saan natalo ito kay Wang Xinyu ng China sa iskor na 7-5, 5-7, 4-6.
Nauna munang tinalo ni Eala sina Dona Vekic ng Croatia sa opening round (4-6, 6-4, 6-4), Petra Marchinko ng Croatia sa second round (6-0, 6-2) at Magda Linette ng Poland sa quarterfinals (6-3, 6-2).
Ito rin ang unang pagkakataon na nagtamabl sa doubles sina Eala at Iva Jovic ng Amerika.
Umabot din sina Eala at Jovic sa semifinals subalit natalo ang dalawa kina third seeds Xu Yifan at Yang Zhao Xuan ng China (5-7, 3-6).
“Alex is not just an exciting young player, but she has already developed into one of the most recognizable players in world tennis,” ani ASB Classic Tournament Director Nicolas Lamperin.
Alam ni Lamperin na malakas ang hatak ni Eala sa mga Pinoy fans na inaasahang muling daragsa sa Auckland para panoorin ang kaniyang mga laban.
“We are excited Alex has chosen to come back to play in Auckland,” ani Lamperin.
- Latest
