Cool Smashers ‘di maawat sa pananalasa

MANILA, Philippines —  Humataw si Jema Galanza ng 19 points mula sa 18 attacks at isang service ace para sa 25-16, 22-25, 25-21, 15-25, 15-10 panalo ng Creamine kontra sa Nxled sa 2026 Premier Volleyball League All-Filipino Conference kahapon sa FilOil Centre sa San Juan City.

Nag-ambag si Bernadeth Pons ng 18 markers para sa 5-1 baraha ng Cool Smashers tampok ang five-game winning streak habang may 16 at 13 markers sina Tots Carlos at middle blocker Pangs Panaga, ayon sa pagkakasunod.

Tumipa si setter Jia De Guzman ng 28 excellent sets at may 15 receptions si libero Jen Nierva para sa 10-time PVL champions.

“Talagang patibayan na lang talaga ng loob, ng dibdib para makuha iyong panalo na iyon,” sabi ni coach Sherwin Meneses. “Thankful nga ako kasi nag-respond iyong veteran players.”

Bagsak ang Chameleons sa ikaapat na sunod na kabiguan para sa 3-4 baraha matapos ang 3-0 panimula.

Pumalo si Fil-Am Brooke Van Sickle ng 28 points at may 22 at 12 markers sina Myla Pablo at Fil-Am middle blocker MJ Phillips, ayon sa pagkakahilera.

Inagaw ng Nxled ang fourth set, 25-15, sa likod nina Van Sickle, Pablo at Phillips para makatabla sa Creamline patungo sa pang-siyam na fifth setter sa torneo.

Dalawang sunod na puntos ang iniskor ni Pons para sa 8-4 abante ng Cool Smashers sa fifth frame.

Sa likod nina Van Sickle at Phillips ay nakalapit ang Chameleons sa 10-13.

Humataw naman sina Galanza at Pons para tapusin ng Cool Smashers ang laro sa 3-2.