Cignal, Chery Tiggo nakatutok sa finals
MANILA, Philippines — Isa lamang sa Cignal HD at Chery Tiggo ang papasok sa finals ng 2025 Premier Volleyball League (PVL) on Tour.
Paglalabanan ng HD Spikers at Crossovers ang finals berth sa kanilang knockout semifinals game ngayong alas-4 ng hapon sa Smart Araneta Coliseum.
Ito rin ang parehong hangad ng PLDT High Speed Hitters at Creamline Cool Smashers sa kanilang duwelo sa ikalawang laro sa alas-6:30 ng gabi.
Sa kanilang pagsampa sa semifinals ay nabigyan ang Cignal, Chery Tiggo, PLDT at Creamline ng tiket para sa PVL Invitational Conference na magsisimula sa Agosto 19.
Dalawa pang foreign guest teams ang makakaharap nila sa min-tournament na idaraos sa PhilSports Arena sa Pasig City.
Winalis ng HD Spikers ang Akari Chargers, 25-20, 25-11, 28-26, habang pinatalsik ng Crossovers ang Nxled Chameleons, 25-17, 25-15, 25-20, para itakda ang kanilang semis showdown.
Muling aasahan ng Cignal sina Erika Santos, Roselyn Doria, Tin Tiamzon, Jackie Acuña, setter Gel Cayuna at rookies Erin Pangilinan at Jessa Ordiales.
Nagmula si Santos sa PLDT kung saan siya naglaro ng apat na taon.
“Alam ko kasi kung ano pa ‘yung kaya niyang gawin — even before pa. Kaya sabi ko sa sarili ko, tutulungan ko siya at ibibigay ko ‘yung best ko, kung ano ‘yung binibigay ko kina Gel at sa buong team,” sabi ni coach Shaq delos Santos sa dating La Salle Lady Spikers star.
Itatapat ng Chery Tiggo sina Ara Galang, Cess Robles, Aby Maraño Imee Hernandez at rookies Renee Peñafiel at Jyne Soreno.
Sa kanilang unang pagtutuos sa pool play noong Hulyo 19 ay pinabagsak ng Crossovers ang HD Spikers, 25-13, 26-28, 25-15, 25-15.
Itinakda ang one-game championship match sa Linggo sa MOA Arena sa Pasay City.
Matapos ito ay sisimulan ang PVL Invitational Conference.
- Latest
