Baluyot wagi kay Catalan sa URCC
MANILA, Philippines — Tinalo ni Eros Baluyot si Rene Catalan, Jr. via armbar submission sa second round sa Universal Reality Combat Championship (URCC) Kaogma Collision 2 sa Fuerte Sports Complex sa Capitol Grounds sa Cadlan Pili, Camarines Sur.
Ang laban nina Baluyot, No. 447 sa hanay ng mga MMA fighters sa Asia Pacific Region, at Catalan sa URCC flyweight championship ay ang main event ng makasaysayang MMA confrontations sa probinsya.
Binigo rin ni Baluyot ang ama ni Catalan via rear naked choke sa URCC noong Agosto ng 2023.
Sa iba pang laban para sa pagdiriwang ng mga Bicolanos sa pagkakatatag sa Camarines Sur bilang isang probinsya, dinaig ni Jun Hyung Lee si Jayson Magallo sa pamamagitan ng technical knockout sa kanilang featherweight interim championship.
Nagwagi ang Team World sa Team Pinas, habang nanaig naman angTeam Manila sa Team CamSur sa dalawang pares na 3v3.
Ang fight card, suportado nina Gov. Lray Villafuerte, Cam Sur 2nd District Representative Luigi Villafuerte at 5th District Representative Migz Villafuerte, ay bahagi ng isang summertime province-wide festivity ukol sa pagiging probinsya ng Camarines Sur.
Nagpasalamat si URCC president at founder Alvin Aguilar sa mga Villafuertes.
Panalo rin sina Menard Atole, Alex Asio Jr, Robin Leonen, Jhon Brutas, Rufino Mante at Ian Lora.
- Latest
