Northport inakay ni Jack sa liderato

MANILA, Philippines — Nasikwat ng NorthPort ang solong liderato matapos ang dikit na 107-103 panalo kontra sa Magnolia sa 2024 PBA Commissioner’s Cup kahapon sa Ninoy Aquino Stadium sa Maynila.

Tumikada ng 30 puntos, 11 rebounds, 2 steals at 2 tapal si Kadeem Jack upang trangkuhan ang ikatlong sunod na panalo ng Batang Pier patungo sa tuktok ng 13-team standings.

Nauna nang tinalo ng NorthPort ang NLEX, 114-87, at Terrafirma, upang maagaw pansamantala ang bentahe mula sa kapwa unbeaten teams na Hong Kong Eastern at Meralco na may parehong 2-0 kartada.

Solidong nakatambal ni Jack ang ace player na si Arvin Tolentino na kumamada ng 27 puntos at 4 rebounds sahog pa ang tig-1 steal at tapal habang may 25 puntos si Joshua Munzon.

May ambag ding 9 puntos, 4 rebounds, 10 assists at 4 steals ang point guard na si Fran Yu para sa Batang Pier na napigilan ang comeback ng Hotshots mula 13-point deficit.

Na-kontrol agad ng NorthPort ang laban sa halftime matapos ang 31-21 ratsada sa second quarter hanggang sa makapagtayo ng 94-81 bentahe sa third quarter sa kalagitnaan ng payoff period.

Abante pa ang NorthPort sa 104-95 sa huling 29 segundo bago muntikang makabalikwas ang Magnolia sa hanggang 103-105 matapos ang tres ni Aris Dionisio, may 9 na segundo pa sa laban.

Sa kabutihang pa­lad, swak ang dalawang freethrows ni Yu bago naagawan din si Joseph Eriobu para sa huling tira at potential game-tying basket sana ng Magnolia mula sa four-point line.

Pumukol ng 27 puntos ang rookie na si Jerom Lastimosa, may 16 puntos si Rome dela Rosa habang may 14 at 13 puntos din sina Mark Barroca at Dionisio, ayon sa pagkakasunod.

Nagkasya lang sa 10 puntos at 13 rebounds ang import na si Ricardo Ratliffe na ininda ng Hotshots tungo sa 1-2 kartada matapos ang unang kabiguan kontra sa Converge, 93-91.