3 teams target ang liderato sa Pool A
![3 teams target ang liderato sa Pool A](https://media.philstar.com/photos/2024/07/19/cherry_2024-07-19_20-33-17.jpg)
MANILA, Philippines — Mag-uunahan sa pag-angkin sa solong liderato sa Pool A ang Chery Tiggo, Nxled at PLDT sa 2024 Premier Volleyball League (PVL) Reinforced Conference sa Philsports Arena sa Pasig City.
Sasagupain ng Crossovers ang Chameleons ngayong alas-2 ng hapon kasunod ang pagharap ng High Speed Hitters sa Galeries Tower Highrisers sa alas-4 ng hapon.
Sa alas-6 ng gabi, kapwa tangka ng Creamline Cool Smashers at Farm Fresh Foxies na mapasama sa win column.
Umiskor ang Chery Tiggo ng 25-13, 27-25, 25-13 panalo sa Farm Fresh, habang nakalusot ang Nxled sa Galeries Tower, 25-19, 22-25, 25-18-, 25-27, 15-12, sa kanilang mga unang laro.
Bumanat si American import Khat Bell ng 23 points mula sa 22 attacks at isang block sa panalo ng Crossovers sa Foxies.
“I’m coming in with the same mentality, same mindset. It’s been amazing to come back and the hospitality has been unreal,” sabi ni Bell sa kanyang pagbabalik sa Pinas.
Nagdagdag si Mary Rhose Dapol ng walong puntos kasunod ang tig-limang marka nina Seth Rodriguez at Pauline Gaston.
Itatapat ng Chameleons si American reinforcement Meggan Hart na pumalo ng 19 points sa likod ng 12 attacks at pitong kill blocks.
Samantala, sasakyan naman ng PLDT ang malaking 16-25, 25-22, 24-26, 25-19, 15-12 panalo sa Creamline sa pagharap sa Galeries Tower.
Pipilitin naman ng Galeries Tower na makabawi mula sa five-set loss sa Nxled.
Ito rin ang hangad din ng Creamline at Farm Fresh sa kanilang upakan.
- Latest