Ginebra, NLEX agawan sa panalo
MANILA, Philippines — Lintik lang ang walang ganti para sa Barangay Ginebra habang hindi papasindak ang NLEX sa bigatin nilang sagupaan sa umaatikabong 2024 PBA Governors’ Cup ngayon sa Smart-Araneta Coliseum.
Magkaibang daan ng tinahak ng Gin Kings at Road Warriors subalit parehong asam ang krusyal na panalo sa main game ng Group B double-header sa alas-7:30 ng gabi.
Lumasap ang mga bataan ni coach Tim Cone ng mapait na 95-88 silat na kabiguan kontra sa Blackwater noong nakaraang linggo kaya siguradong gigil na makabalikwas agad lalo’t tengga sila sa ilalim ng standings.
May 1-2 kartada ang Barangay Ginebra, kahit pa may presensya ni resident import at Gilas Pilipinas naturalized player Justin Brownlee, matapos ding yumukod sa Rain or Shine, 73-64.
Sa San Miguel palang nakakaisa ang Gin Kings, 108-102 na halatang nasa transition phase palang matapos balasahin ang roster nang ipalit ang mga beteranong sina Christian Standhardinger at Stanley Pringle para kina Isaac Go at Stephen Holt.
Magtatangka ang NLEX na mapigilan ang gigil na ito ng Ginebra sakay ng kanilang malaking 112-108 panalo sa overtime kontra sa isa pang contender na San Miguel Beer nitong Sabado lang sa Cagayan de Oro.
Panatag sa 3-1 kartada ang koponan ni returning PBA coach Jong Uichico sa likod lang ng unbeaten Group B leader Rain or Shine (4-0) pero hindi papakampante sa pangunguna nina ace guard Robert Bolick at import Myke Henry.
Samantala, magpapangbuno sa first game sa alas-5 ng hapon ang Blackwater (1-3) at Phoenix (0-3).
- Latest
