Madayag hinugot ng Kurobe

MANILA, Philippines — Madaragdagan ang Pilipinong maglalaro sa Japan V.League.

Mapapasama na sa listahan si middle blocker at Choco Mucho Flying Titans team captain Maddie Madayag na kinuha bilang import ng Japanese professional volleyball club Kurobe Aqua Fairies.

Inihayag na ng Aqua Fairies ang pagkuha kay Madayag sa kanilang mga social media accounts.

Isa lamang ang dating Ateneo de Manila University standout sa tatlong imports ng Aqua Fairies para sa  2024-25 Japan V. League 1 season.

Kasama ni Madayag sina Lena Stigrot ng Germany at Iris Scholten ng Netherlands.

Masaya naman ang pamunuan ng Flying Titans sa bagong karanasang ito para kay Madayag.

“Join us in sending our captain, Maddie Madayag, all the best as she takes on Japan with the Kurobe Aqua Fairies!” ayon sa post ng Flying Titans sa social media.

Suportado ng Choco Mucho ang Japan stint ni Madayag na malaki ang maitutulong sa kanya upang mas lalo pa itong mahubog.

“We’re incredibly proud of you, Maddie, for seizing this amazing opportunity in your career. Your Choco Mucho Flying Titans fam is with you every step of the way,” ayon pa sa post ng Choco Mucho.

Sa kasalukuyan, tatlo na ang Pinoy imports sa Japan V.League.

Magbabalik si Creamline playmaker Jia De Guzman bilang import ng Denso Airybees habang nasa JT Marvelous naman si Jaja Santiago.