Eala umukit ng korona sa ITF France doubles

MANILA, Philippines — Muling nagningning si Alex Eala nang angkinin nito ang korona sa women’s doubles ng ITF W75 Open 3C de Seine et Marne na ginanap sa Comete de Seine et Marne de Tennis sa Croissy-Beaubourg, France.

Katuwang ni Eala si French partner Estelle Cascino kung saan iginupo nito sina top seeds Maia Lumsden ng Great Britain at Jessica Ponchet ng France sa bisa ng pukpukang 7-5, 7-6 (4) desisyon sa championship round.

Ito ang ikalawang korona ni Eala sa doubles matapos mangibabaw sa ITF Nuc-Deccan sa Pune, India noong Enero kung saan kapares nito si Darja Semenistaja ng Latvia.

Nakuha nina Eala at Cascino ang 5-4 kalamangan sa second set. Subalit hindi agad bumitiw sina Lumsden at Ponchet na naitabla ang laro sa 5-5 at 6-6.

Kaya naman hindi na nagpatumpik-tumpik pa sina Eala at Cascino sa tiebreak makaraang magpaulan ito ng solidong serves at baseline game para makuha ang panalo.

Nakapasok sa finals sina Eala at Cascino nang patalsikin nito sina Marie Weckerle ng Luxembourg at Kira Pavlova ng Russia sa semifinals, 6-3, 6-3.

Wagi rin sina Eala at Cascino kina Swiss Celine Naef at Indian Prarthana Thombare sa Round-of-16 sa iskor na 5-7, 6-2, 10-6, at kina British Emily Appleton at Dutch Isabelle Haverlag sa quarterfinals, 6-4, 6-0.