51 pts ni LaVine ibinasura ng Pistons
DETROIT -- Kumamada si Jalen Duren ng 23 points at 15 rebounds para banderahan ang Pistons sa 118-102 paggupo sa Chicago Bulls at ibinasura ang career-high 51 points ni Zach LaVine.
Nag-ambag si Cade Cunningham ng 25 points at 10 assists para sa Detroit na tinapos ang 15-game losing slump sa Chicago habang may 18 markers si Alec Burks mula sa bench.
Ito ang unang 50-point game ni LaVine ngayong NBA season para maging unang Bulls player na umiskor ng 50 points at walang assist matapos si Michael Jordan laban sa Miami Heat noong Nobyembre 6, 1996.
Umalalay si DeMar DeRozan sa kanyang 20 markers kasunod ang 12 markers ni Nikola Vucevic.
Sa Toronto, kumamada sina Joel Embiid at Tyrese Maxey ng tig-34 points sa 114-107 pagdaig ng Philadelphia 76ers laban sa Raptors.
Tumapos ang reigning NBA Most Valuable Player na si Embiid na may 9 rebounds, 8 assists at 2 blocked shots habang may 7 assists at 6 rebounds si Maxey.
Sa New Orleans, tumipa si Brandon Ingram ng 26 points at may 24 markers si Zion Williamson para giyahan ang Pelicans sa 96-87 panalo sa New York Knicks.
Nagtala si RJ Barrett ng 18 markers para sa New York na kumulapso sa New Orleans sa fourth quarter isang araw matapos talunin ang Atlanta Hawks.
- Latest
