F2 target ang 2nd win sa Galeries
MANILA, Philippines — Hahatawin ng F2 Logistics ang ikalawang dikit na panalo sa pagsagupa sa baguhang Galeries Tower sa Premier Volleyball League Second All-Filipino Conference.
Magtutuos ang Cargo Movers at Highrisers ngayong alas-4 ng hapon kasunod ang salpukan ng Petro Gazz Angels at Nxled Chameleons sa alas-6 ng gabi sa Candon City Arena sa Ilocos Sur.
Solo ng Creamline ang liderato hawak ang 3-0 record kasunod ang Petro Gazz (2-0), Akari (3-1), Chery Tiggo (2-1), Choco Mucho (2-1), PLDT Home Fibr (2-1), F2 Logistics (1-1), Nxled (1-1), Cignal HD (1-2), Galeries Tower (0-2), Gerflor (0-3) at Farm Fresh (0-4).
Unang nabigo ang Cargo Movers sa Chargers, 25-21, 20-25, 25-27, 25-19, 8-15, bago nanaig sa Chameleons, 25-20, 25-14, 25-16.
Sa nasabing panalo ng F2 Logistics kontra sa Nxled ay humataw si Ivy Lacsina ng 19 points mula sa 15 attacks at 4 blocks.
“Mas nagkaroon kami ng communication ngayon kasi doon kami nagkulang last game versus Akari and ‘yung trabaho namin, hindi na kami masyadong nag-stop ngayon,” ani Lacsina.
Nakalasap naman ang Highrisers ng 11-25, 24-26, 22-25 pagkatalo sa Gazz Angels.
Samantala, pipilitin ng Petro Gazz na saluhan sa liderato ang Creamline habang determinado ang Nxled na makabangon sa naunang kabiguan.
- Latest
