Pasig pasok sa semis
MANILA, Philippines — Humakot ng solidong double-double performance si Justin Araña upang akayin ang Pasig-Sta. Lucia papasok sa semifinals ng Chooks-to-Go-MPBL Invitational matapos ang pambihirang 70-66 panalo kontra sa San Juan-Go For Gold AICC kahapon sa Mall of Asia Arena sa Pasay City.
Naglista ang Arellano University big man ng 11 puntos at 11 rebounds sahog pa ang apat na supalpal para sa Realtors na makakaharap ang Mindoro-EOG Burlington o Basilan-Jumbo Plastic Medical Depot sa knockout semifinals.
Krusyal din ang ambag ni Fran Yu na may 11 puntos kabilang na ang pambaong layup sa huling minuto habang may 12 at 10 markers din sina Japs Bautista at Jekster Apinan, ayon sa pagkakasunod.
Kagagaling lang ng Pasig sa 85-73 panalo sa Negros kamakalawa upang makumpleto ang 5-0 sweep at masikwat ang No. 1 seed sa Pool A, na nagtakda sa kanilang quarterfinal matchup versus Pool C No. 2 team San Juan.
Walang pahi-pahinga para sa Realtors na sasabak sa ikatlong sunod na araw kontra sa Mindoro o Basilan na naglalaro pa as of press time para sa puwesto sa semifinals ng 22-team Invitationals.
- Latest
