Painters isinalba ni Rey Nambatac

MANILA, Philippines — Kinumpleto ni Rey Nambatac ang isang krusyal na three-point play sa huling 22.2 segundo para itakas ang Rain or Shine laban sa Phoenix, 90-88, sa 2021 PBA Governors Cup kahapon na tumapak sa Smart Araneta Coliseum sapul noong magpandemya.

Tumapos si Nambatac na may 17 points para tulungan ang Elasto Painters (2-1) na pigilin ang hangad na pagsosyo ng Fuel Masters (2-1) sa liderato.

“With a young team we have to be able to get through tough games like this,” sabi ni coach Chris Gavina na nakahugot kay Beau Belga ng 16 markers kasunod ang 15 points ni import Henry Walker.

Ang 3-point play ni Nambatac kay Phoenix guard Chris Banchero ang nagbigay sa Rain or Shine ng 89-88 abante sa huling 22.2 segundo sa fourth quarter matapos maiwanan sa 77-86. Sinundan ito ng turnover ni Banchero sa po-sesyon ng Fuel Masters na nagresulta sa split ni Mark Borboran para sa 90-88 pabor sa Painters sa natitirang 8.7 segundo.

Samantala, inihulog ng Meralco (1-0) ang Blackwater (0-3) sa PBA record na ika-22 sunod nitong kamalasan matapos kunin ang 98-77 panalo tampok ang 28 points, 13 rebounds, 2 assists at 2 steals ni import Tony Bishop.

“I thought he played really good tonight. He guided us to victory and that’s what important,” sabi ni coach Norman Black sa PBA debut ni Bishop na nagsalpak ng isang three-point shot para sa 44-29 abante ng Bolts sa Bossing sa 3:04 minuto ng second period patungo sa halftime, 48-36.

Nakalapit ang Blackwater sa 47-56 agwat mula sa triple ni Rashwan McCarthy sa gitna ng third quarter bago nagpakawala ang Meralco ng 19-4 atake sa likod ni Bishop para itala ang 24-point lead, 75-51, sa huling 59 segundo nito.

Ang tres ni Bishop sa huling 4:31 minuto ng final canto ang nagpadyak sa 90-67 kalamangan ng Bolts para selyuhan ang kanilang panalo sa Bossing.