Korona pag-aagawan ng Blue Eagles at Green Batters

MANILA, Philippines – Pag-aagawan ng magkaribal na Ateneo De Ma­nila University at De La Salle University ang UAAP Season 81 men’s baseball championship.

Nakatakda ang Game Three ng dalawang kopo­nan ngayong alas-12 ng tanghali sa Rizal Memorial Baseball Stadium.

Isa lamang sa Blue Eagles at Green Batters ang tatapos sa kanilang mahigpitang best-of-three championship series.

Inangkin ng La Salle ang Game One, 9-7, habang nakabawi naman ang Ateneo sa 7-3 panana­ig sa Game Two noong Martes para itulak ang kapana-panabik na Game Three.

Bumandera sa nasabing panalo ng Blue Eagles si pitcher Miggy Angeles.

“He was sensational,” wika ni Ateneo head coach Bocc Bernardo kay Angeles.

Nagtala naman si Javi Macasaet ng 4-of-4, samantalang humataw si Gino Tantuico ng dalawang homeruns para sa Katipunan-based team.

Hangad ng Blue Eagles na muling mapasa­ka­may ang UAAP crown na huli nilang naisuot no­ong 2017 nang talunin ang University of Santo Tomas Tigers, habang tinapos ng Green Batters ang kanilang 13-year title drought noong 2016.

Sa men’s football, sumipa si Jarvey Gayoso ng da­lawang goal para sa 3-1 panalo ng Ateneo kontra sa La Salle, 3-1, kahapon sa FEU-Diliman pitch.