Durant na-injured; Westbrook nagbida

WASHINGTON -- Sumalaksak si Kevin Durant pasugod sa basket sa first half, umangat sa ere at na-foul.

Nang matapos ang naturang aksyon ay paika-ikang naglakad ang 2013-14 NBA MVP sa loob ng court at hi-nawakan ang kanyang napuwersang kaliwang hamstring.

“I came down a little awkward,’’ sabi ni Durant sa hallway sa labas ng kanilang locker room, “and landed on it a little harder than I wanted to and I pulled it.’’

Nang lumabas ng court si Durant sa halftime dahil sa kanyang injury, sinalo naman ni Thunder teammate Russell Westbrook ang kanyang naiwang trabaho at nagposte ng triple-double sa tinapos na 22 points, 11 assists at 11 rebounds para igiya ang Oklahoma City sa 125-101 panalo laban sa Washington Wizards.

Hindi nakalaro si Durant sa halos kabuuan ng nakaraang season dahil sa nabaling kanang paa na nangailangan ng tatlong operasyon kaya si Westbrook ang hinirang na NBA scoring champion.

Naulit ang senaryo nang magtala si Westbrook ng 10 points, 5 assists at 3 rebounds sa third quarter para bigyan ng malaking kalamangan ang Thunder bago ipinahinga sa fourth quarter.

“With Kevin not coming out of the locker room in the second half,’’ sabi ni Thunder coach Billy Donovan kay Durant. “I thought our guys came out with great focus.’’

Tumapos si Durant, ikalawa sa NBA sa scoring, na may 14 points at 10 rebounds sa first half.