Gilas inangkin ang 2nd place sa Jones Cup

TAIPEI – Gamit ang kanilang mas malalim na eksperyensa, madaling pinatumba ng Gilas Pilipinas ang bagitong Chinese Taipei B, 96-67, para pi­ta­sin ang second place sa pagtatapos ng 2015 Jones Cup kahapon dito sa Xinchuang Gymnasium.

Nag-init ang mga kamay ni Gary David para tu­mapos na may game-high na 22 points, tampok dito ang dalawang three-pointers, habang nagdag­dag sina Jayson Castro, Ra­nidel de Ocampo at Mo­ala Tautuaa ng 15, 12 at 10 markers, ayon sa pag­­­kakasunod.

Tinapos ng Nationals ang torneo sa kanilang  6-2 baraha sa ilalim ng 7-1 marka ng nagkampeong Ira­nians.

Ang mga pinadapa ng Gilas Pilipinas ay ang Chinese Taipei A (77-69), Spartak-Primorye ng Russia (85-71), Japan (75-60), Wellington Saints ng New Zealand (92-88) at USA Select-Overtake (78-74).

Ang dalawa nilang ka­biguan ay mula sa South Korea (70-82) at Iran (65-74).

Sinabi ni coach Tab Baldwin na kuntento siya sa kanilang naging kampanya sa torneo bilang pre­parasyon sa mas mabigat na 2015 FIBA Asia Championship sa Changsha, China sa Setyembre 23 hanggang Oktubre 3.

“With all the circums­tances, I’m pleased with the second-place finish. It’s respectable,” wika ni Baldwin. “It’s not really want you want, but we take the most of it. And there are many positives."

Itinala ng Nationals ang 50-32 sa halftime bago ibaon ang Taipei B sa ipinosteng 30-point lead, 82-52, sa pagwa­wa­kas ng third period.

Inaasahang makaka­sa­ma ng Nationals si n­a­turalized player Andray Blatche, hindi nakalaro sa Jones Cup dahil sa pagkakasakit ng kanyang ina sa United States, sa kanilang unang en­sayo sa Manila sa Mi­yer­kules.

Tatlong practice days ang gagawin ng Gilas Pi­lipinas bago sumabak sa MVP Cup na siya nilang magiging pi­nakahuling tune-up meet.

Ito ay nakatakda sa Set­yembre 11-13 sa Smart Araneta Coliseum.

GILAS PILIPINAS 96 – David 22, Castro 15, Tau­tuaa 12, De Ocampo 10, Abueva 8, Intal 7, Ramos 7, Thoss 6, Rosario 6, Ganue­las-Rosser 3, Norwood 0, Tau­lava 0.

Chinese Taipei B 67 – Chien 18, Hsiao 14, Lin 9, Lee 9, Huang 8, Lee 3, Liu2, Lin CW 2, Chen 2, Chou 0, Cheng 0, Chien 0.

Quarterscores: 24-21; 50-32; 82-52; 96-67.