Davao men’s beach volley team kampeon sa BIMP-EAGA

LABUAN, Malaysia – Nadomina ng men’s beach volleyball squad ng Team Mindanao-Philippines, kinatawan ng Davao City, matapos gapiin ng tambalan nina Francis Caunga at Calvin Sarte ang East Kalimantan, 21-18, 21-19 nitong Martes sa 8th BIMP-EAGA (Brunei, Indonesia, Malaysia, Philippines-East Asia Growth Area) Friendship Games sa Palm Beach Resort & Spa dito.

 Kapwa senior student sa University of Mindanao at Holy Cross of Davao College, ayon sa pagkakasunod, ratsada ang opensa at matibay na depensa ang ipi-namalas nina Caunga at Sarte para makabawi sa kabiguang natamo sa elimination round upang tanghaling kampeon sa taunang torneo na bahagi ng matibay na pagkakaisa ng apat na bansang kalahok.

“I have always believed in them, their skills and determination. We changed strategy in the finals after our loss to East Kalimantan in the eliminations. Tighter defense worked best for us,” sambit ni coach Abet Bernan. “I am so proud of them.”

 Ikinalugod din ni Philippine Sports Commission (PSC) chairman Richie Garcia ang tagumpay ng Team Davao na pinangasiwaan ni team manager Tisha Goldie Delvo. Ang sports agency ang major sponsors ng 120-man Team Mindanao delegation.

Samantala, umusad sa championship match ng women’s badminton doubles ang tambalan nina Marinel Diansay at Macy Anne Salvado nang gapiin ang karibal na sina Lloydryena Xalfira Simon at Yong En-En ng Sarawak, Indonesia, 21-7, 21-13 sa semifinals sa  Labuan Sports Complex badminton hall.

Naunang ginapi ng kapwa 17-anyos na sina Diansay at Salvado, pinangasiwaan ni coached Jethra Villa-nueva, ang tambalan nina  Nurul Adinda at N.R. Azizah ng South Sulawesi, 21-12, 21-13 sa quarterfinals.

Sasabak din sa kampeonato ang men’s basketball and men’s regu team sa sepak takraw. Haharapin ng Davao cagers ang Sabah para sa gintong medalya sa basketball, habang umusad sa finals ang sepak hitters nang gapiin ang Brunei Darussalam, 21-19, 21-19 sa JS Sport Hall.

Sa kasalukuyan, tangan ng Davao City ang tatlong ginto, tatlong silver at apat na bronze medal, tampok ang dalawang ginto sa athletics ni Sonny Wagdos.