Nakapanggulat ang Princess Ella

MANILA, Philippines - Nanggulat ang Princess Ella nang lumabas ito bilang pinakamahusay na kabayo sa pinaglabanang PCSO 2-Year Old Special Maiden Race noong Sabado sa San Lazaro Leisure Park sa Carmona, Cavite.

Ang karerang ito ay sinahugan ng P1 milyon prem-yo  ng nagtaguyod na Philippine Charity Sweepstakes Office (PCSO) at ang connections ng Princess Ella ay nagkamit ng P600,000.00 gantimpala.

Hindi gaanong napaboran ang kabayong diniskartehan ni John Alvin Guce dahil pumangatlo lamang ang tambalan sa Novatos race noong Hunyo 14 at dinomina ng Cat Express.

Ang Super Spicy ni Fernando Raquel Jr. ang siyang patok sa pitong kabayo na naglaban matapos ang magandang ipinakita sa isang Trial Race habang napusuan din ang nanalo sa Trial Race na Hook Shot ni Jeff Zarate.

Pero hindi umubra ang Hook Shot sa katatagan na naipakita ng Princess Ella para pumangalawa lamang habang ang Super Spicy ay hindi tumimbang.

May natanggap  na P225,000.00 ang connections ng Hook Shot habang nakasingit sa ikatlong puwesto ang Jazz Asia para masungkit ang P125,000,00 premyo.

Bukod sa magandang gantimpala,  hindi mala-yong isali ang Princess Ella kapag inilarga na ang Juvenile Stakes races na itinataguyod ng Philippine Racing Commission (Philracom).

Hindi naman nagkaroon ng problema si Jonathan Hernandez sa paggabay sa Providence para mapangatawanan ang pagiging liyamadong kabayo sa PCSO Special Handicap race para sa class division 1A.

Ikalawang opisyal na takbo pa lamang ito ng Providence sa taong ito at nailista ni Hernandez ang ikalawang dikit na panalo matapos maihatid sa tagumpay ni EM Raquel noong Abril 12. Ang panalo ay nagresulta para kunin din ng tambalan ang P100,000.00 gantimpala na ibinigay ng PCSO sa nagwaging lahok.

Samantala, magkakaroon ng karera ngayon sa Santa Ana Park sa Naic, Cavite para pasimulan ang pista sa linggong ito.