UE nilusutan ang NU; UST wagi sa Adamson

MANILA, Philippines - Kinumpleto ni Roi Su­mang ang isang four-point play sa huling 3.7 se­gundo para ibigay sa University of the East ang 71-67 panalo kontra sa National University sa 76th UAAP men’s basketball tour­nament kagabi sa Smart Araneta Coliseum.

May 19 puntos si Su­mang sa laro at ang tres ang ikalawang binitiwan laban sa depensa ni Bob­by Ray Parks, Jr. sa hu­ling yugto para makabawi ang Red Warriors matapos matalo sa FEU sa ka­nilang unang laro.

Ang unang tres niya ay nagbigay sa UE ng 67-63 kalamangan, pero na­gawang makabangon ng Bulldogs sa likod ni Parks bago nasundan ng dalawang split nina Gelo Alolino at Emmanuel Mbe.

Sumablay sa opensa ang UE pero natawagan ng 24-second violation ang NU para mabalik sa Warriors ang bola sa hu­ling  21.4 segundo.

Inubos ni Sumang ang oras bago tumirada ng tres kasabay ng pagsabit ng kamay ni Parks para sa isang 4-point play.

Si Charles Mammie ay may 20 rebounds, 15 puntos, 3 assists at 3 steals para sa UE.

Inalis na sa lineup ng NU si 6-foot-8 Came­roo­nian Alfred Aroga ma­­ta­pos mapatunayan ng UAAP board na kulang si­­ya sa residency.

Sinandalan naman ng UST ang krusyal na jum­­per ni Jeric Teng para angkinin ang 67-62 panalo kontra sa Adamson at makasalo ang FEU sa liderato sa 2-0 karta.

Ang buslo ni Teng sa huling 8.8 segundo ay nangyari matapos hu­ma­bol ang Falcons mula sa 63-53 agwat at nakadikit sa 62-64.