DSWD may cash-for-work sa college tutors, YDWs

MANILA, Philippines — Kasabay ng paghahanda para sa nalalapit na school opening, sinimulan na ng Department of Social Welfare and Development (DSWD) ang pagbibigay ng suweldo para sa cash-for-work (CFW) ng mga college tutors at Youth Development Workers (YDWs) sa ilalim ng Tara, Basa! Tutoring Program ng ahensya.

Ayon kay Assistant Secretary at Spokesperson Irene Dumlao, sinimulan na ang pagbibigay ng 1st tranche ng cash-for-work para sa mga college tutors upang makatulong sa mga ito para sa kanilang mga bayarin ngayong papalapit na ang pasukan.

“We have started distributing the first tranche of the cash-for-work of our college tutors and YDWs as the opening of classes is also approaching. This way, our beneficiaries can use their earnings for their school needs,” ani Asst. Secretary Irene Dumlao. 

Unang namahagi ng cash-for-work payout ang DSWD Field Office-7 (Central Visayas) noong Hulyo 15, kung saan nakapaloob sa initial compensation ang unang 10 sessions na isinagawa ng mga  program beneficiaries.

Pinangunahan ni DSWD Central Visayas Regional Director Shalaine Marie Lucero ang ­ceremonial payout para sa 642 tutors at YDWs mula sa Cebu Normal University (CNU). 

Makatatanggap ang bawat tutor at YDW ng halagang P468 kada araw para sa 3-hour tutorial at parenting sessions na kanilang ginugol sa pagtuturo sa mga grade school learners at parents. 

Nakabase ang suweldo ng CFW batay na rin sa minimum wage rate ng bawat rehiyon.

Magkakasabay na nagsimula ang tutoring sessions noong July 1 sa mga implementing regions sa Regions 3 (Central Luzon), 7 (Central Visayas), 8 (Eastern Visayas), 10 (Northern Mindanao), 12 (SOCCSKSARGEN), at 4-A (CALABARZON). Magtatapos ang activities sa July 26 bilang completion ng kanilang 20 sessions.

Ang Tara, Basa! Tutoring Program ay isang reformatted educational assistance ng DSWD kung saan unang in-implement ito sa National Capital Region noong 2023.