Mag-utol dinedbol ng kandidato sa Iloilo
MANILA, Philippines — Isang magkapatid ang nasawi matapos pagbabarilin umano ng isang kumakandidatong Sangguniang Bayan member sa Ajuy, Iloilo, kamakalawa ng gabi.
Kinilala ang magkapatid na nasawi na sina Edmund, 36, at Ramon Articulo, 22, kapwa nakatira sa lugar.
Sa imbestigasyon ng Ajuy Police Station, pinuntahan umano ng magkapatid na noon ay lasing ang bahay ng suspek at sa hindi pa matukoy na dahilan ay nagkaroon umano ng pagtatalo.
Sa gitna ng pagtatalo ay bumunot ng baril ang suspek at ilang beses na pinagbabaril si Edmund sa dibdib.
Nang tangkang tumulong si Ramon ay pinagbabaril din siya ng suspek. Kaagad dinala sa ospital ang magkapatid na idineklara silang dead on arrival.
Napag-alaman na may dati na umanong alitan ang suspek at ang magkapatid. Nakuha sa lugar ang 10 basyo ng bala na nanggaling sa isang .45 caliber pistol.
Patuloy pa ang imbestigasyon ng Ajuy MPS at tinutugis na ng mga otoridad ang suspek na hindi muna pinangalanan.
- Latest
