Lady exec pinagnakawan, sinaksak ng ex-LTO examiner
BUTUAN City, Philippines — Isang babaeng executive ng motor insurance company sa lungsod na ito ang pinagnakawan at sinaksak ng dating kawani ng Land Transportation Office (LTO) sa kahabaan ng national highway, Purok 7, Brgy. Ampayon.
Kinilala ni Butuan City Police Station 4 commander Major Henry Samillano Jr., ang biktimang si Mary Cris Olarte Naranjo, 48, residente ng Barangay Holy Redemer, Butuan City.
Naaresto naman ang suspek na si Ismael Baratas, 47, dating examiner sa driving license division ng LTO-Butuan City office.
Sa inisyal na imbestigasyon, alas-7:40 ng umaga kahapon ay minamaneho ng biktima ang kanyang itim na SUV Mt. Everest at binabagtas ang kahabaan ng national highway nang siya ay parahin ng suspek na sakay ng motorsiklo.
Pagkahinto ng biktima ay nilapitan siya ng suspek at nagpahayag ng holdap at sabay saksak sa una.
Tumakas ang suspek sakay ng kanyang motorsiklo at tinangay ang mahigit P60,000 pera, alahas at cellphone.
Kasalukuyang nagpapagaling sa Butuan City Medical Center ang biktima.
- Latest
