Bus vs trak: 6 sugatan

TUGUEGARAO CITY, Cagayan, Philippines – Anim-katao ang nasugatan makaraang salpukin ng pabulusok na pampasaherong bus ang nakatirik na 16-wheeler truck sa gilid ng bulubunduking highway sa Barangay Tactac, bayan ng Sta. Fe, Nueva Vizcaya kahapon ng madaling araw. Ayon kay SPO2 Ronald Castillo, kabilang sa mga sugatang biktima na isinugod sa Sta. Fe Rural Health Clinic ay ang drayber ng GV Florida Bus na si Dante Taloza.? Nabatid na nawalan ng kontrol sa manibela si Taloza sa pabulusok na bahagi ng zigzag highway at natumbok nito ang nakatirik na trak na ipinarada ng drayber nitong si Marciano Abesamis dakong alas-4 ng madaling araw. Nabatid na patungong Cagayan ang bus nang maganap ang sakuna.