Mag-asawa dedo sa road mishap
BULACAN, Philippines – Hindi na maipagdiriwang ng mag-asawa ang Kapaskuhan na kapiling ang kanilang pamilya matapos na masangkot ang kanilang sasakyan at dalawang iba pa sa malagim na sakuna sa kahabaan ng North Luzon Expressway sa Barangay Malhacan, Meycauayan City, Bulacan kahapon ng umaga.
Naisugod pa sa Valenzuela General Hospital ng rescue team subalit hindi na umabot pa ng buhay ang mag-asawang sina Fernando Cordero, 64; at Isidra Cordero, 60, kapwa nakatira sa Gen. Luna St., Malabon City.
Sumuko sa pulisya ang drayber na si Reymar Lucenio, 25, ng Harmony Hills II, Brgy. Loma De Gato, bayan ng Marilao, Bulacan habang tumakas naman ang isa pang drayber ng closed van na hindi naplakahan.
Sa ulat na natanggap ni PO3 Robert Bergado, lulan ng owner-type jeep (NPD-396) ang mag-asawa nang salpukin nito ang sinusundang closed van sa lane 3 ng nasabing highway.
Nabangga naman ng Isuzu Elf drop side na minamaneho ni Lucenio ang likurang bahagi ng jeep ng mag-asawa kaya nawalan ng control sa manibela ng jeep ang driver na si Fernando.
Dito na sumalpok sa concrete barrier ang jeep ng mag-asawa na kapwa nawalan ng malay.
Kaagad namang sumaklolo ang rescue team kung saan hindi na umabot ng buhay sa ospital ang mag-asawa.
- Latest
