Buhawi nanalasa, higit 30 bahay wasak!
COTABATO CITY , Philippines — Mahigit 30 na bahay na gawa lang sa semi-permanent materials sa dalampasigan ng Barangay Milbuk sa Palimbang, Sultan Kudarat ang nawasak nang manalasa ang buhawi o malakas na hangin nitong hapon ng Huwebes.
Sa inisyal na ulat nitong Biyernes ng local government unit ng Palimbang, 35 na mga pamilya ang apektado ng nasabing kalamidad, napilitang lumikas sa mga temporary evacuation sites at sa mga bahay ng mga kamag-anak sa mga karatig na barangay.
Ayon sa mga opisyal ng Palimbang Municipal Disaster Risk Reduction and Management Office, sobrang lakas ng hangin na bumayo sa Sitio Sta. Cruz sa Barangay Milbuk na nilipad nito sa malayo ang mga atip, bubungan at mga dingding ng mga bahay sa naturang lugar.
Nagpaabot na ng inisyal na ayuda ang tanggapan ni Palimbang Mayor Joenime Kapina sa mga apektado ng naturang kalamidad, ayon sa mga ulat ng mga himpilan ng radyo sa Cotabato City nitong umaga ng Biyernes.
- Latest
