3 bahay naatrasan ng truck

MANILA, Philippines - Bulagta ang isang lalaki habang apat naman ang nasu­gatan makaraang maatrasan ng 10-wheeler truck ang tatlong bahay sa Barangay Tikling, bayan ng Taytay, Rizal kahapon ng umaga. Kinilala ang namatay na si Domingo Francisco ng Barangay Dolores sa nasabing bayan habang sugatan naman sina John Lester Eustaquio, John Lennon Eustaquio, Eleanor Eustaquio at si John Michael Eustaquio na naisugod sa Taytay Doctors Hospital. Sa ulat na nakarating kay P/Senior Supt. Bernabe Balba, Rizal PNP director, naganap ang insidente dakong alas-4:15 ng madaling araw makaraang mawalan ng control sa manibela ang driver ng truck (ZRL-306) na kargado ng buhangin. Nabatid na dumausdos pababa ang truck at inatrasan ang tatlong bahay ng mga biktima na noon ay natutulog pa. Kaagad na tumakas ang driver sa takot na kuyugin ng mga residente matapos ang aksidente.