Preso nagbigti sa selda

MANILA, Philippines - Pinaniniwalaang desperado sa buhay ang 61-anyos na preso kaya ito nagbigti sa loob ng selda sa himpilan ng pulisya sa Barangay Poblacion, bayan ng Lanuza, Surigao del Sur kamakalawa. Sa police report na nakarating sa Camp Crame, bandang alas-2:30 ng madaling araw ng madiskubre ang pagpapakamatay ni Pedro Uriarte na isa sa detainee sa Lanuza PNP station. Huling namataang buhay ang biktima na nakikipag-usap kina PO1 Ronielo Ruina at PO2 Jiff Felix matapos itong mapansin na balisa at malungkot. Gayon pa man, bandang alas-3:45 ng madaling araw habang nagsasagawa ng pag-iinspeksyon sa mga selda si PO3 Ronald Cabis ay bulagata ang biktima na nakabitin sa rehas na bakal kung saan ginamit ang nylon na nakatali sa kulambo.