EDITORYAL — Tensiyon sa WPS mas misaka pa

Dunay makaalarma kaayong kalamboan bahin sa West Philippine Sea nga siguradong makaapektar og maayo sa mga mananagat nga Pilipino ug ingon man sa mga nagpuyo didto sa Kalayaan Group of Islands (Pagasa).

Kini ang paghatag sa gobiyerno sa China og otorisasyon sa ilang Coast Guard (CG) nga dakpon ang si bisan kinsang langyaw kun sila gidudahang nag "trespassing" ug pwede silang prisuhon sud sa 60 ka adlaw nga walay husay sa korte nga mahitabo.

Matud pa moepekto kini sugod karong Hunyo 15 sumala pa sa Chinese state-run news agency nga China News Service.

Ang kamandoan gipagawas niadtong Mayo 15, dungan sa adlaw diin gilusad ang “Atin Ito” convoy sa mga sibilyang Pilipino nga nilawig padung sa Panatag (Scarborough) Shoal sa West Philippine Sea.

Kani nga lakang makadugang kini sa kainit sa tension, apan usa lamang kini sa pamaagi sa China sa pagsukod sa kung asa kutob kayang makigtugot og pisi ang Pilipinas diha sa WPS.

Samot na nga ang WPS dili ilahang teritoryo ug sila ray namugos nga ilaha kini.

Kinahanglang molihok na ang mga opisyales sa gobiyerno sa Pilipinas mahitungod niini.

Molihok nga may panaghiusa ug dili magkabahin-bahin sama sa nakita karon sa publiko nga dunay pipila ka mga magbabalaod nga gidudahang adto nakapusta pabor sa China.

Para sa China “trespassing” na kun ang mga Pilipino maoy hisgutan, apan wala sila magtan-aw nga daghan sa ilang mga barko ug sila mismo nakalapas na sab sa international law ug lokal nga mga balaod sa Pilipinas.

Ang kalainan lang, duna silay pwersa ug kusog aron iimplimentar ang ilang kaugalingong interpretasyon, ang Pilipinas kuwang sa aksyon tungod kay mismong mga opisyales nga naa sa posisyon nagkabahinbahin.

Kini tungod kay duna kanila ang mas nidapig sa China tungod sa pressure gikan sa mga impluwensiyadong personalidad nga dunay personal nga interes.

Kaning bag-ong kamandoan, makapasiga kini sa nag-umidong tension tali sa Pilipinas ug sa China.