Neri, nagpakita nung Pasko

MANILA, Philippines — Ang laki ng ipinayat ni Neri Naig sa post na Christmas family picture ni Chito Miranda, kasama ang tatlo nilang anak.

Labis ang tuwa at pasasalamat ni Chito at kanyang buong pamilya na isa sa best gift ang paglaya ngayong kapaskuhan ng misis. Nagkataon pa na 10th wedding anniversary nila last Dec. 13.

Kaya bumuhos din ang Christmas greetings ng fans na natuwa dahil nabuo muli ang pamilya ng bokalista ng Parokya ni Edgar.

Nakulong nga si Neri dahil sa kinasangkutang syndicated estafa at iba pang kaso na may kaugnayan sa isang derma clinic.

Samantala, hinihintay ng fans ng Parokya ni Edgar kung anong kanta ang naisulat ni Chito, mula sa matinding pagsubok sa kanyang pamilya, lalo na sa kanyang misis na negosyante.

Kathryn, ginawan ng isyu kay Francine

Maraming pumuri sa magandang gesture ni Vice Ganda nang ipagitna niya si Kathryn Bernando sa pagitan nila ni Vhong Navarro sa kanilang ABS-CBN Christmas Special 2024 kamakailan.

Ang siste, nasa first row sa itaas ng stage sina Kathryn, Francine Diaz, at Seth Fedelin sa Araneta. Nasa harap naman sina Vice at It’s Showtime hosts habang kumakanta. Nagmagandang loob lang si Kathryn na yayain si Francine na bumaba ng baitang sa stage. Dahil magka-holding hands sina Francine at Seth ay hinatak na rin ng una ang kanyang ka-loveteam.

Paglingon ni Vice ay pinapunta niya si Kathryn sa harap.

Simpleng eksena lang, pero nagsanga-sanga na ang interpretasyon ng netizens dahil nawala sa eksena si Francine. Ang haba ng mga comment sa social media. Talagang hindi matapos ang bangayan na pinag-aaway ang fans nina Kathryn at Francine. 

Sa unang tingin kasi, parang kawawa ang dating ni Francine dahil natakpan na siya nina Vice at Kathryn sa likod. Pero in fairness, ang bait talaga ni Kathryn na niyaya niya si Francine.

Ang intensyon lang talaga nila na kita sa video ay batiin si Mrs. Cory Vidanes at Sharon Cuneta na magkatabi na nasa unahan sa linya ni Vice.

In fairness kay Vice ay makikita rin sa video na pinansin din ng komedyante sina Seth at Francine. Si Seth pa ang nag-guide para makadaan si Kathryn para pumunta sa gitna.

Hirit ng fans na siyempre ay deserve ni Kathryn bilang queen ay dapat naman talaga na isa siya sa sentro ng stage.

Kung sabagay, tapos na ang Pasko at by his time limot na ito ng fans dahil ‘di rin naman gaanong lumaki.