Batang Pier biyaheng semis
MANILA, Philippines — Inangkin ng No. 1 NorthPort ang unang semifinals berth matapos sibakin ang No. 8 Magnolia, 113-110, sa kanilang quarterfinals duel sa Season 49 PBA Commissioner’s Cup kahapon sa Ninoy Aquino Stadium sa Malate, Manila.
Bumalikwas ang Batang Pier mula sa isang 14-point halftime deficit para sumampa sa ikatlo nilang semifinals stint at kauna-unahan simula noong 2019 Governors’ Cup.
Lalabanan ng tropa ni coach Bonnie Tan sa best-of-seven semifinals series ang mananaig sa quarterfinal showdown ng No. 4 Barangay Ginebra at No. 5 Meralco
Kumolekta si import Kadeem Jack ng 30 points, 10 rebounds, 5 steals at 3 blocks at habang tumipa si Arvin Tolentino ng 25 markers.
“Every practice namin tsina-challenge sila ni coach Bonnie, especially iyong second group. Because going to the playoffs, Arvin, Josh (Munzon) and even Kadeem pinaghahandaan na iyan ng teams eh,” ani assistant coach Rensy Bajar. “That’s why we need everybody to be involved not only in the defense but also in the offense.”
Nagtapos ang four-game winning streak ng Hotshots patungo sa kanilang Boracay vacation.
Bumangon ang NorthPort mula sa 47-61 halftime deficit para maglunsad ng isang 19-1 atake sa likod nina Jack at Tolentino at agawin ang 66-62 bentahe sa 6:45 minuto ng third period.
Ang three-point shot ni William Navarro at tatlong free throws ni Evan Nelle ang nagbaon sa Magnolia sa 101-87 sa 5:29 minuto ng fourth quarter.
- Latest
