Galedo ipinadyak ang Masters ITT silver
Sa Asian Road Championships
MANILA, Philippines — Hinablot ni Mark John Lexer Galedo ang silver medal sa Masters 40-44 years old category ng individual time trial (ITT) sa Asian Cycling Confederation Road Championships sa Phitnasulok, Thailand.
Nagsumite ang 39-anyos na si Galedo ng bilis na 28 minuto at 25.2 segundo para sumegunda sa 21-km race na pinagharian ni local bet Tawatchai Jeeradechatam na mas mabilis ng 35 segundo sa Pinoy rider.
Si Galedo ay isang ITT gold medalist sa Myanmar 2013 Southeast Asian Games.
Nakuntento si Thai cyclist Kritsana Keawjun sa bronze sa Masters races na nilahukan din ni Roderic Calla at tumapos sa sixth place sa 45-49 years old group.
Nagretiro si Galedo, isang Special Citation awardee sa nakaraang Philippine Sportswriters Association-San Miguel Corp. Annual Awards, bilang elite rider noong 2024 at inilinya sa 40-44 category sa Phitnasulok event.
Si Galedo ay bahagi ng mga coaches sa 21-cyclist national team na kumakampanya sa torneo na suportado ng PhilCycling, Philippine Sports Commission at MVP Sports Foundation.
Nagpasalamat si Galedo sa PSC, kay Philippine Olympic Committee at PhilCycling president Abraham ‘Bambol’ Tolentino at sa 7Eleven Roadbike Philippines.
“Thank you to the PSC, POC (Philippine Olympic Committee) and PhilCycling president (Abraham) Bambol Tolentino, to 7Eleven Roadbike Philippines, to my family for the opportunity to compete here,” ani Galedo.
- Latest
