Ligang labas ni Quiambao aprub sa La Salle

MANILA, Philippines — Nilinaw ni UAAP MVP Kevin Quiambao na may basbas ng De La Salle University coaching staff at management ang paglalaro nito sa ligang labas.

Nakitang naglaro si Quiambao sa isang liga sa Sariaya, Quezon kasama ang Team Laiya.

Ngunit iginiit ni Quiambao na bago ito maglaro, nagpaalam muna ito sa coaching staff at management ng La Salle.

“Lahat ng galaw ko pinapaalam ko sa management namin, kay Coach Topex, sa lahat ng coaching staff. May basbas naman sila na ingatan mo ang sarili mo kasi ang number one rule namin sa team ay use your judgment,” ani Quiambao.

Base sa patakaran ng UAAP, hindi maaapektuhan ang eligibility nito sa liga dahil pinapayagan na ang mga student-athletes na makapaglaro sa ibang liga or torneo habang ongoing ang UAAP season.

“There are no prohibitions preventing student-athletes or sports teams from participating in other tournaments or leagues while competing in the UAAP,” ayon sa UAAP rules.

Kaya naman hindi magiging isyu ang paglalaro nito sa ligang labas lalo pa’t binigyan ito ng go signal ng pamunuan ng La Salle.

Kaliwa’t kanan ang kritisismong tinatanggap ni Quiambao sa social media.

Ngunit hinahayaan lamang nito ang mga bashers.

Sa halip, ginagawa niya itong motibasyon upang mas lalo pang magsumikap sa kanyang mga ginagagawa lalo pa’t marami itong obligasyon na dapat pagtuunan ng pansin.

Maliban sa paglalaro sa La Salle, bahagi si Quiambao ng Gilas Pilipinas pool.

Kamakailan lamang ay isinilang ang anak nito kaya’t binibigyang pansin din ito ang kanyang pagiging mabuting ama sa kanyang pamilya.

Itinanggi rin ni Quiambao na tumanggap ito ng malaking halaga sa paglalaro nito sa ligang labas.