Lady Blazers ‘di matibag sa No. 1 spot

MANILA, Philippines — Muling nasolo ng defending champions College of Saint Benilde ang tuktok ng team standings matapos nilang pagulungin ang Arellano University, 25-16, 25-20, 25-14, sa NCAA Season 99 women’s volleyball na nilaro sa Filoil EcoOil Arena, San Juan kahapon.

Malinis sa anim na pa­nalo ang Taft-based squad, nirehistro nila ang 35 sunod na panalo kasama sa mga nakaraang seasons.

Sakaling ikadena nila ang panalo sa huling tatlong natitirang laro ay diretso na agad sila sa Finals pagkatapos ng elimination round.

Natikman naman ng Lady Chiefs ang pangatlong kabiguan sa anim na salang kaya naka-puwesto sila sa pang-anim.

Pinamunuan ni Jessa Dorog ang opensa para sa Lady Blazers sa itinalang 13 points, habang 10 ang inambag ni Michelle Gamit at tig-walo ang kinana nina Wielyn Estoque at Zamantha Nolasco.

Humarabas naman si Pauline De Guzman ng 12 markers pero hindi sapat para itaguyod sa panalo ang Arellano may 10 points naman ang binakas ni M­arianne Lei Angelique Padillon.

Samantala, nagwagi sa unang laro ang Lyceum of the Philippines kontra Emilio Aguinaldo College, 16-25, 25-18, 25-19, 25-12.