Non pansamantalang papalit kay Salud

MANILA, Philippines – Nilinaw kahapon ng Philippine Basketball Association na sasaluhin lamang ni PBA board chairman Ro­bert Non ang binakanteng puwesto ni dating league pre­sident/CEO Chito Salud hanggang Enero.

Gagawin ito ni Non nang walang tatanggaping su­wel­do.

Sakaling makahanap ng kapalit ni Salud ay kaagad na iiwanan ni Non ang natu­rang puwesto.

Ang nasabing posisyon ay inialok kina dating PBA chairman Patrick Gregorio at vice chairman Erick Are­jola.

“The vice chairman declined, saying he’s very busy. Mr. Gregorio, meanwhile, said he can’t make an answer right away as he’s also busy,” sabi ni PBA media bureau chief Willie Marcial.

At dahil sa wala kina Gre­gorio at Arejola na gustong sumalo sa trabaho ni Salud ay si Non ang napagkaisahan ng PBA Board na pansamantalang umakto bilang president/CEO.

“There are netizens reacting why from San Miguel again? Mr. Gregorio himself has said it’s not about the personality. It’s based on the structure,” dagdag pa ni Marcial.

Nauna nang hinikayat ni Non si Salud na ikunsidera ang kanyang pagbibitiw.

Ngunit hindi nagbago ng kanyang desisyon si Salud, ang pang-walong PBA Commisisoner.

“I talked to him Tuesday asking him if he can stay on until the end of the season and, later on, until the end of the all-Filipino tourney. But he’s really decided. Sabi nya pagbigyan ko naman daw siya,” wika ni Non.

Ang pagbibitiw ni Salud ay sinasabing kaugnay sa kawalan niya ng papel sa PBA matapos mahirang si Chito Narvasa bilang PBA Commissioner.