Impeachment ni Sara

Kadaghanan sa mga kongresista sa nasud misuporta gyud sa tinguha nga palagputon sa katungdanan si Vice President Sara Duterte. Dinhi sa Cebu, duha ra ka kongresista ang wa mopirma sa impeachment complaint, sila mao si Pablo John Garcia (Cebu 3rd District) ug Cutie Del Mar (Cebu City north district).

Dunay nangutana kon makaayo ba sa mga kongresista ang wa nila pagpirma sa impeachment complaint, o kaha makadaot kini sa ilang mga political ambition?

Ingon niini ang akong ikasulti. Posible nga kadtong mga mipirma sa impeachment complaint kon mga kandidato sila sa May 12 elections, di gyud sila botaran sa mga dumadapig ni Sara, apan ang mga wa makagusto ni Sara adto usab kanila mobotar.

Sa Davao regions, sa siyam ka kongresista, usa ra kanila ang mipirma sa impeachment complaint. Kon ang paggamit sa intelligence funds ni Sara maoy basehan, ako pabor ko nga taralon sa hukmanan ang vice president.

Mao kini ang akong giingon nga kon tinud-anay ang iyang tinguha nga modagan siya pagka presidente sa nasud unya sa 2028, angay’ng limpyohan daan ni Sara ang iyang nga’n.

Kwarta gikan sa buhis sa katawhan ang kapin sa P100 million nga gipiyal ngadto kang Sara, unya gigasto lang kini sulod sa 21 ka adlaw.

Dihang gipangutana hain mapunta ug unsay gigastohan sa kwarta, matud pa nga ang intelligence fund gihatag ngadto sa usa ka Mary Grace Piattos ug unsa pa to, nga ang nga’n mora’g kan-onon para snack.

Ang Philippine Statistics Authority mitataw nga way Mary Grace Piattos nga narehistro sa PSA, ug apil na kadtong ubang mga gihatagan kuno sa intelligence funds.

Nindot kaayo ni kay kon mahinayon ang impeachment trial didto sa Senado, mapaminaw na nato unsay mga tubag ni Sara, ingon man makit-an nato kinsa sa atong mga senador nga nag-usik-usik lang sa ilang dagkong sweldo kay dili makamao.

Ang Kongreso, mitudlo na og 11 ka kongresista nga maoy prosecutors sa impeachment complaint, apan ang pangutana, silang 11 sigurado ba gyud kaha nga modaog sa election karong Mayo 12?

Aw, kadtong mga kongresista nga gitudlo na nga prosecutors sa impeachment trial unya dili makadaog sa eleksyon, ilisan ra sila ug kongresista nga suhito sa balaod.

Kinahanglang mga abogado nga kongresista ang itudlo nga prosecutor, aron dili ra sila kataw-an sa abogado nga kuhaon ni Sara nga sigurado ko nga pulos gyud “de kampanilya,” kun mga banggiitan.

Usbon ko, si Presidente Bongbong Marcos dili gyud unta gusto nga ipahigayon ang impeachment complaint apan dili man niya mabut-an ang mga kongresista.