Gulo sa Zambo

Ngayo’y may digmaan doon sa Zamboanga

Pawang Pilipino ang nagsasagupa;

Tayong naririto sa Luzon, Visayas

Sa mga naroon tayo’y awang-awa!

Ganitong labanan ay hindi marapat

Ang nagpapatayan ay magkakabalat;

Magulang, kapatid buhay nauutas

Tayong apektado ay nakikimatyag!

Bakit nangyayari ganitong labanan

Sa isang panahong malaya ang bayan;

Bakit tayo-tayo ang nagpapatayan

Gayong nasa labas tunay na kalaban!

Sa tuwing sa bansa’y may malaking kaso

Tulad ng pork barrel tayo’y gulong-gulo;

Dapat na ang kaso’y dalhin sa husgado

Bakit sa malayo pumuputok ito?

Hindi ba’t ang isyu sa Metro nangyari

Doon sa Zamboanga ay may nagrebelde;

Maiisip natin mga taong mali –

Nagsikap takasan galit nang marami!

Ganitong nangyari’y naganap din noon

Nang dito’y may baho na biglang naamoy

Hindi malilimot sa Maguindanao iyon –

Botante’t mediamen minasaker doon!

Tila mga anghel ay naging demonyo

Kaya nakaisip paraang ganito;

Sinong mga utak ng sistemang ito’t

Tayong mga Pinoy ginagawang gago?