PNP-AKG nagluluksa sa pagkasawi ng tauhan sa engkuwentro sa kidnappers

MANILA, Philippines — Ipinagluluksa ng Philippine National Police-Anti-Kidnapping Group (PNP-AKG) sa pagkamatay ng isa nilang tauhan  sa engkwentrong naganap sa pagitan ng mga hinihinalang Chinese kidnapper sa Angeles, Pampanga, Sabado ng umaga.

Kabilang ang nasawing si P/Staff Sgt. Nelson Santiago sa mga operatiba ng AKG na nagligtas sa dalawang Chinese citizen na dinukot sa  Makati City noong Sabado ng umaga.

“The PNP Anti-Kidnapping Group stands united in grief, honoring the memory of our fallen comrade,” sa pahayag ng PNP-AKG.

Sinalakay ni Santiago at mga pulis ang hideout ng mga suspek sa Barangay Malabanias noong Sabado dakong alas-2 ng hapon. kung saan sumiklab ang shootout.

Nailigtas ang mga biktima at naaresto ang dalawang Chinese na suspek na sina Hu Kai at Ryu Don. Gayunpaman, sina Santiago at isa pang pulis ang sugatan sa palitan ng putok.

Dinala ang mga pulis sa isang ospital sa Angeles ngunit idineklarang dead-on-arrival si Santiago.