Bangka lumubog, 2 mangingisda nasagip — PCG
MANILA, Philippines — Matagumpay na nailigtas ng mga tauhan ng Philippine Coast Guard (PGC) ang dalawang mangingisda matapos na lumubog ang sinasakyan nilang bangkang pangisda sa karagatang sakop ng Brgy. Santa Rita, Aplaya, Batangas City.
Kinilala ng PCG ang nasagip na mga mangingisda na sina Cryel Tilo at Kimwell de Guzman, na namataang nakahawak sa magkabilang bahagi ng kanilang lumubog na bangka.
Batay sa ulat ng Coast Guard Sub-Station Batangas City, dakong alas-7:10 ng umaga nang makita nila ang paglubog ng FBCA Cyrose sa nabanggit na lugar.
Nauna rito, hinihila umano ng mga mangingisda ang kanilang hook line habang nanghuhuli ng mga isda, ngunit aksidenteng napunta ang dalawa sa isang bahagi lamang ng bangka sanhi upang lumubog ito.
“It was revealed that they accidentally positioned themselves on one side of the banca while pulling their hook line to catch fish, causing the boat to capsize at around 7 a.m. of the same date,” ayon sa pahayag ng PCG. Nasa maayos naman nang kondisyon ang mga mangingisda habang nahila na ring pabalik sa pampang ang kanilang bangka.
- Latest
