Sa Caloocan at Navotas 2 ginang itinumba
MANILA, Philippines - Dalawang ginang ang kapwa nasawi nang pagbabarilin ng mga hindi pa nakikilalang salarin sa magkahiwalay na insidente sa Caloocan at Navotas City.
Sa ulat na ipinadala sa Northern Police District, nakilala ang mga nasawi na sina Eugenia Liwag, alyas Jenny, 48, balo, ng Marulas-B, Brgy. 36, Caloocan City, at si Rosemarie Apog, Jr., 53, ng Block 32 Lot 8 Phase 1A, Brgy. North Bay Boulevard South, Navotas City.
Sa imbestigasyon ng Caloocan City Police, natutulog na sa loob ng kanyang bahay dakong alas-3:40 kahapon ng umaga si Liwag nang pasukin ng mga hindi nakilalang salarin at agad na barilin ito sa mukha sanhi ng agaran nitong kamatayan.
Sa pagsusuri ng NPD- Scene of the Crime Operatives (SOCO), natagpuan sa loob ng bahay ang ilang drug paraphernalia kaya tinututukan ngayon ang pagkakasangkot ng biktima sa operasyon ng iligal na droga.
Dakong alas-11:30 naman kamakalawa ng gabi nang barilin ng tatlong hindi nakilalang salarin si Apog nang kumprontahin ito sa kanto ng Bakoko at Alumahan Street, Brgy. North Bay Boulevard South, Navotas.
Isinugod pa sa Tondo Medical Center si Apog ngunit nalagutan rin ng hininga dakong ala-1:45 ng madaling araw. Patuloy ang imbestigasyon sa naturang krimen.
- Latest
