Lolo kinatay matapos makipaglamay

MANILA, Philippines - Isang 65-anyos na lolo na nakipaglamay sa burol sa isang kakilala ang siya ngayong paglalamayan makaraang saksakin ng isa rin sa nakipaglamay kamakalawa ng gabi sa Paco, Maynila. 

Sa ulat ni SPO1 Ramir Dimagiba, ng Manila Police District-Homicide Section, nabatid na alas-6:30 ng gabi nang magpa­alam sa lamay ang biktimang si Danilo Peliño, residente ng Santiago St., Paco, Maynila subalit habang nagpapaalam umano kasama ang isa pa ay nagkatawanan muna na ikinasama naman ng loob ng isang dayo na nakikipaglamay din.

Hindi umano alam ng biktima na sinundan na siya ng suspect na si Robert Pangilinan, alyas “Bukol”, 37,  ng Calauan, Laguna na nainis sa pag-aakalang siya ang pinagtawanan.

Nang makatiyempo ay hinawakan umano ng suspect ang ulo ng biktima at itinulak sa nakaparadang motorsiklo at nang tumumba ay inundayan ng sunud-sunod na saksak. Nasawi ang biktima habang ginagamot sa  Philippine General Hospital.

Nagsagawa naman ng follow-up operation ang mga awto­ridad para madakip ang suspect. (Ludy Bermudo with trainee Jamille Obcena)