Pinagdudahang miyembro ng Dugo-Dugo 2 kasambahay ipinakulong ng amo

MANILA, Philippines - Dahil  sa duda at  sa hindi umano kapani-pa­­­niwalang salaysay, nag­pasiya ang isang ne­­gos­­yante na sampahan ng reklamong Quali­fied Theft ang dalawa niyang kasambahay sa Ma­nila Police District ka­­ugnay sa pagkawala ng kaniyang mga alahas at cash na umabot sa P2-milyon, sa Paco, Maynila, kamakalawa ng  gabi.

Ipinaaresto sa pulis­ya at saka idineretso sa MPD-General Assignment Section (GAS) ang dalawang kasambahay na kinilalang sina Rubelyn Judilla, 20 at Shiela Samson, 21, tu­bong Antique, Aklan ng kanilang among si Lily Chan, ng HO2 Otis, 888 Residence Paz, sa M. Guanzon St., Paco, May­nila.

Sa ulat ni PO3 Jay Jacob, Qualified Theft ang nakatakdang isam­­pa sa Manila City Prosecutor matapos na sabihin ng  dalawa na may isang babaeng tumawag noong Mayo 7, 2013, bandang alas-4:00 hanggang alas- 5:00 ng hapon at nag­sabi na naaksidente ang kanilang amo.

Sinabi din ng dalawa na inutusan silang kunin sa master’s bedroom ang mga alahas at cash at sinunod ang bilin ng caller na ibigay lahat sa lalaking pupunta sa bahay ng amo.

Subalit, sa testimonya ni Rolly Palarca, security officer sa compound, wala umanong nakarecord na may du­mating at umalis na lalaki sa bahay ni Chan.

Maging sa interogasyon ng MPD-GAS, hindi nagtutugma ang mga pahayag ng dalawang kasambahay. Na­diskubre ang insi­dente ng pag-uwi ng ka­nilang amo.